add
साहित्य स्थानीय खबर

पत्रकार सिग्देलको कथासंग्रह ‘मनोनेट’ बजारमा

बिर्तामोड, २१ जेठ । झापाको बिर्तामोडमा पत्रकार तीर्थ सिग्देलद्वारा लिखित ‘मनोनेट’ कथासंग्रहको विमोचन गरिएको छ ।

‘मनोनेट’को अग्रज साहित्यकार भवानी क्षेत्रीले विमोचन गर्नुभएको हो । पुस्तक विमोचन गर्दै साहित्यकार क्षेत्रीले पुस्तकमा रहेका कथा छोटो र सरल भएको बताउनुभयो ।

‘अहिलेको युग भनेको थोरै बोलेर धेरै बुझाउनुपर्ने युग हो’, उहाँले भन्नुभयो, ‘पुस्तक युग सापेक्ष रहेको छ ।’ कथा छोटा भए पनि कतिपय स्थानमा कवितात्मक शैलीको भएको बताउनुभयो । कथाको अन्त्यमा प्रयोग गरिएका कतिपय वाक्यले कथा पूरा नभएको जस्तो लागे पनि वाक्य मिलन राम्रो भएको उहाँले बताउनुभयो ।

कार्यक्रममा पत्रकार महासंघ झापाका पूर्व अध्यक्ष कृष्ण हुमागाईं, पत्रकार दिपीन राई लगायतले शुभकामना मन्तव्य राख्नुभएको थियो ।

मिडिया रिसर्च सेन्टरले प्रकाशन गरेको पुस्तकमा २२ वटा कथा समेटिएको छ भने पुस्तक १७२ पृष्ठको रहेको छ । पुस्तक बजारमा आइसकेको र मेचीदेखि महाकालीसम्मको उपलब्ध गराउने तयारी भइरहेको लेखक सिग्दलले बताउनुभयो ।

Facebook Comments