जन्म : २०१९ साल असार १९ गते, तोस्राम खोला बस्ती (सिन्धुली) ।
पिता–माता : रामप्रसाद ढुंगाना र तुलसादेवी ढुंगाना ।
स्थायी मुकाम : क्याम्पस मोड, भद्रपुर नपा.–८ (झापा)
विवाह : २०६० सालमा कोपहवा (कपिलवस्तु) निवासी शोभाकर पाण्डे र थानकुमारी पाण्डेकी सुपुत्री मीना पाण्डेसँग ।
कविता–यात्रा :
वि.स.२०३५ देखि ‘गरिमा’, ‘मधुपर्क’, ‘रूपरेखा’, ‘भानु’, दुबो, जुही, ‘रचना’, ‘अभिव्यक्ति’, ‘समष्टि’, ‘बगर’, ‘मिर्मिरे’, ‘झंकार’, ‘आलेख’, ‘शिवपुरी सन्देश’, ‘आधारशिला’, तत्कालीन नेपाल राजकीय प्रज्ञा प्रतिष्ठानबाट प्रकाशन हुने ‘कविता’ आदि साहित्यिक पत्रिकाहरूका साथै ‘गोरखापत्र’, ‘कान्तिपुर’, ‘हिमाल खबर’, ‘पूर्वाञ्चल’ पत्रिका तथा डिजिटल पोर्टल ‘रातोपाटी’, ‘सेतोपाटी,’ ‘साहित्य पोष्ट’, ‘घटना र विचार’, ‘झापा अन्लाइन’ लगायतमा सयौं रचना प्रकाशित ।
पत्रकारिता–यात्रा :
साहित्यिक फाँटमा सानै उमेरदेखि कविता लेखनबाट चर्चित राजेश ढुंगानाको समानान्तर क्रियाशीलता पत्रकारितामा रहँदै आएको । २०३९ सालदेखि राष्ट्रिय साप्ताहिक ‘देशान्तर’ को झापा संवाददाता, तत्कालीन समयका राष्ट्रियस्तरमा चर्चित समाचारमूलक एवम् विचारप्रधान साप्ताहिक पत्रिकाहरू– ‘विमर्श’, ‘सुरुचि’, ‘अग्निपथ’ तथा ‘गोरखापत्र’ र ‘स्पेशटाइम’ दैनिकमा २ वर्षसम्म स्तम्भकार, ‘नेपाल पुकार’को विशेष प्रतिनिधि, ‘नव युगवाणी’ र ‘राष्ट्र पुकार’ को सम्पादकीय टिममा संलग्न रहँदै अफ्सेट प्रविधिबाट प्रकाशित नेपालको पहिलो साप्ताहिक ‘जनमञ्च’को सम्पादक । एकताका लामो समयसम्म झापा जिल्लाका चर्चित अखबार ‘विवेचना’ र ‘पूर्वाञ्चल’ दैनिक एवम् ‘साप्ताहिक विचार’का लागि स्तम्भकार र अन्तर्वार्ताकार ।
‘घटना र विचार’ पत्रिका र अन्लाइन पोर्टलमा हालसम्म पनि स्तम्भकार एवम् समसामयिक विषयवस्तुमाथि तिक्खर कलम चलाउँदै आएका पत्रकार राजेश ढुंगाना हाल भद्रपुरबाट प्रकाशित हुँदै आएको ‘साप्ताहिक समाचार’ पत्रिकाको अतिथि–सम्पादक ।
पुस्तकाकार कृति :
वि.स.२०७० मा पहिलो कृति ‘सुकिला मान्छेको सामूहिक मृत्यु’, २०८० सालमा सोही कविता–संग्रहको दोस्रो संस्करण र २०८१ सालमा अर्को कविता–संग्रह ‘मैले खोजेको देश’ का कृतिकार ।
कविताको सत्ता स्थापना गर्ने स्रष्टा ढुंगानाका केही कृति प्रकाशोन्मुख पनि छन् । जसमध्ये ‘दिमागको वीर्य’ र देशका चर्चित केही साहित्य–सर्जकहरूको व्यक्तित्व र विशेषता झल्काउने ‘व्यक्ति कविता’ नामक कविता संग्रह र एउटा संस्मरणात्मक कृति ‘सम्झे जति’ भन्ने रहेको छ ।
पुरस्कार/सम्मान :
– लेखनाथ पुस्तकालयद्वारा ‘चूडामणि रेग्मी झर्रो शैली पुरस्कार’ (२०८०)
– झापाली साहित्य समाजद्वारा ‘सप्तरंगी सम्मान’ (२०८१)
– नेपाल प्रेस युनियन, झापा शाखाद्वारा पत्रकार सम्बद्ध सो संगठनको संस्थापकका रूपमा सम्मान–पत्र (२०८२)
– देवकोटा स्मारक संरक्षण समितिद्वारा ‘मनोरथ दाहाल स्मृति काव्य पुरस्कार’ (२०८२)
समग्रमा, ४५ वर्षदेखि साहित्यिक एवम् पत्रकारिता क्षेत्रका एक अविश्रान्त अक्षर–योद्धा ।
प्रस्तोता : राजबाबु शंकर
