झापा, २५ असार । साबिक विजेता अर्जेन्टिना र स्विट्जरल्यान्डले अन्तिम १६ को खेलमा जित हात पार्दै फिफा विश्वकप–२०२६ को क्वार्टरफाइनल समीकरण पूरा गरेका छन्।
अन्तिम १६ मा अर्जेन्टिनाले इजिप्टविरुद्ध ३–२ को रोमाञ्चक पुनरागमन जित निकाल्दै अन्तिम आठमा स्थान बनाएको हो। अर्को खेलमा स्विट्जरल्यान्डले कोलम्बियालाई निर्धारित समय र अतिरिक्त समयमा बराबरीपछि टाइब्रेकरमा ४–३ ले पराजित गर्दै ७२ वर्षपछि विश्वकपको क्वार्टरफाइनलमा प्रवेश गरेको छ।
पहिलो पटक ४८ टोलीको सहभागितामा आयोजना भएको विश्वकपबाट अन्तिम १६ चरण सकिँदा ४० टोली बाहिरिएका छन् भने अब आठ टोली उपाधि होडमा बाँकी रहेका छन्।
तीन देशका १६ स्टेडियममा भइरहेको प्रतियोगिताको क्वार्टरफाइनल चरणका सबै खेल भने अमेरिकामै हुनेछन्।
क्वार्टरफाइनलको पहिलो खेलमा अघिल्लो संस्करणको उपविजेता फ्रान्सले मोरक्कोसँग बोस्टनमा प्रतिस्पर्धा गर्नेछ। लस एन्जलसमा स्पेन र बेल्जियम आमनेसामने हुँदा मायामीमा नर्वेले इंग्ल्यान्डको चुनौती सामना गर्नेछ।
क्वार्टरफाइनलको अन्तिम खेल कान्सास सिटीमा हुनेछ, जहाँ साबिक विजेता अर्जेन्टिना र स्विट्जरल्यान्डबीच प्रतिस्पर्धा हुनेछ। स्विट्जरल्यान्डले सन् १९५४ यता पहिलो पटक विश्वकपको अन्तिम आठमा स्थान बनाएको हो।
गोल्डेन बुटको दौड रोमाञ्चक
क्वार्टरफाइनलसँगै गोल्डेन बुटको प्रतिस्पर्धा पनि थप रोमाञ्चक बनेको छ। अर्जेन्टिनाका कप्तान Lionel Messi पाँच खेलमा आठ गोलसहित सर्वाधिक गोलकर्ताको सूचीमा शीर्ष स्थानमा छन्।
उनलाई Erling Haaland र Kylian Mbappé ले समान सात गोलसहित पछ्याइरहेका छन्। समान गोल भए पनि असिस्टमा अघि रहेकाले हालान्ड दोस्रो र एमबाप्पे तेस्रो स्थानमा छन्।
Harry Kane छ गोलसहित चौथो स्थानमा छन्। यस्तै Ismaïla Sarr, Jude Bellingham, Julián Quiñones, Mikel Oyarzabal, Ousmane Dembélé र Vinícius Júnior ले समान चार–चार गोल गरेका छन्।
असिस्टतर्फ Michael Olise पाँच असिस्टसहित शीर्ष स्थानमा छन्। Brahim Díaz र Bruno Guimarães ले समान चार–चार असिस्ट दिएका छन्।
हालसम्म प्रतियोगितामा १५ खेलाडीले दोहोरो पहेँलो कार्ड तथा १३ खेलाडीले रातो कार्ड पाइसकेका छन्। अमेरिकी टोलीका Folarin Balogun लाई दिइएको रातो कार्ड फिफाले फिर्ता लिएपछि त्यस विषयले व्यापक चर्चा र विवादसमेत निम्त्याएको थियो।
