झापा, ३ साउन । फिफा विश्वकप–२०२६ अन्तर्गत तेस्रो स्थानका लागि भएको खेलमा इंग्ल्यान्डले फ्रान्सलाई ६–४ गोलअन्तरले पराजित गर्दै प्रतियोगिता तेस्रो स्थानमा टुंग्याएको छ।
मियामी स्टेडियममा सम्पन्न खेलमा पहिलो हाफमै ४–० को सशक्त अग्रता बनाएको इंग्ल्यान्डले दोस्रो हाफमा फ्रान्सको पुनरागमन प्रयासलाई निष्फल पार्दै प्रभावशाली जित निकालेको हो।
इंग्ल्यान्डका लागि बुकायो शाका नायक बने। उनले ह्याट्रिक पूरा गर्दै टोलीको जितमा निर्णायक भूमिका खेले। खेलको तेस्रो मिनेटमा डेक्लान राइसले गोल गर्दै इंग्ल्यान्डलाई अग्रता दिलाएका थिए। त्यसपछि १८औँ मिनेटमा कोन्शाले हेडमार्फत दोस्रो गोल गरे भने ३७औँ मिनेट र पहिलो हाफको इन्जुरी समयमा शाकाले लगातार दुई गोल गर्दै पहिलो हाफमै इंग्ल्यान्डलाई ४–० को अवस्थामा पुर्याए।
दोस्रो हाफमा भने फ्रान्सले उत्कृष्ट पुनरागमनको प्रयास गर्यो। कप्तान किलियन एमबाप्पेले ४८औँ मिनेटमा पहिलो गोल फर्काए। त्यसपछि ब्राडली बारकोलाले ५४औँ मिनेटमा तथा एमबाप्पेले ६६औँ मिनेटमा अर्को गोल गर्दै खेललाई ४–३ को रोमाञ्चक अवस्थामा ल्याए।
तर ८७औँ मिनेटमा शाकाले पेनाल्टीमार्फत व्यक्तिगत तेस्रो तथा टोलीका लागि पाँचौँ गोल गर्दै इंग्ल्यान्डको अग्रता पुनः फराकिलो बनाए। इन्जुरी समयमा उस्मान डेम्बेलेले फ्रान्सका लागि चौथो गोल गरे पनि अन्तिम क्षणमा जुड बेलिङ्घमले गोल गर्दै इंग्ल्यान्डलाई ६–४ को जित दिलाए।
योसँगै इंग्ल्यान्डले सन् १९६६ मा विश्वकप जितेपछि पहिलो पटक विश्वकपमा तेस्रो स्थान हासिल गरेको छ। यसअघि सन् २०१८ को विश्वकपमा इंग्ल्यान्ड चौथो स्थानमा सीमित भएको थियो।
यता, खेलमा दुई गोल गरेका फ्रान्सेली कप्तान किलियन एमबाप्पेले जारी विश्वकपमा आफ्नो गोल संख्या १० पुर्याउँदै गोल्डेन बुटको दौडमा अग्रता बनाएका छन्। अर्जेन्टिनाका कप्तान लियोनेल मेसीको नाममा हाल ८ गोल रहेको छ। मेसीले स्पेनविरुद्ध हुने फाइनल खेल खेल्न बाँकी रहेकाले गोल्डेन बुटको प्रतिस्पर्धा अझै खुला रहेको छ।
