झापा, ६ कात्तिक । चीनको तिब्बत स्वायत्त क्षेत्रको दुर्गम भेगमा बिहीबार राति ७.० म्याग्निच्युडको शक्तिशाली भूकम्प गएको छ। भूकम्पबाट तत्काल मानवीय क्षति वा भौतिक संरचनामा नोक्सानी भएको विवरण प्राप्त नभएको जनाइएको छ।
चीनको भूकम्प सञ्जाल केन्द्र (सीईएनसी) ले जारी गरेको विवरणअनुसार स्थानीय समयअनुसार बिहीबार राति १०ः३३ बजे नाग्छु सहरको बाकेन काउन्टीमा भूकम्प गएको हो। भूकम्पको केन्द्रबिन्दु जमिनको सतहबाट करिब १० किलोमिटर गहिराइमा रहेको थियो।
चिनियाँ सरकारी समाचार संस्था सिन्ह्वाका अनुसार भूकम्पको केन्द्रबिन्दु तिब्बतको क्षेत्रीय राजधानी ल्हासाबाट करिब ४०० किलोमिटर उत्तरमा पर्छ।
भूकम्पको धक्का नाग्छु क्षेत्रमा तीव्र रूपमा महसुस गरिएको थियो भने ल्हासासम्म पनि सामान्य कम्पन अनुभव गरिएको जनाइएको छ।
भूगर्भविद्हरूका अनुसार कम गहिराइमा केन्द्रबिन्दु भएका भूकम्पले जमिनको सतहमा बढी तीव्र कम्पन उत्पन्न गर्न सक्छन्। यसले ग्रामीण क्षेत्रका भवन, भौतिक संरचना तथा यातायात मार्गमा क्षति पुर्याउने जोखिम रहन्छ।
उच्च भूभागमा अवस्थित तिब्बती पठारको उक्त क्षेत्रमा जनघनत्व कम रहेकाले मानवीय क्षति सीमित हुन सक्ने अनुमान गरिएको छ। यद्यपि भूकम्पबाट भएको वास्तविक क्षतिको विवरण तत्काल स्पष्ट भइसकेको छैन।
स्रोतः “सिन्ह्वा समाचार संस्था”
