झापा, ११ मंसीर । हुलाकी राजमार्गअन्तर्गत झापा गाउँपालिका–२ र गौरीगञ्ज गाउँपालिका–१ जोड्ने करिब ७२३ मिटर लम्बाइको कन्काई पुल निर्माणको ठेक्का १४ वर्षपछि रद्द गरिएको छ।
सडक विभाग मातहतको हुलाकी राजमार्ग निर्देशनालयअन्तर्गत योजना कार्यालय इटहरीले पप्पु महादेव खिम्ती संयुक्त उपक्रम ९जेभी०सँग भएको ठेक्का सम्झौता बिहीबार अन्त्य गरेको सार्वजनिक सूचना जारी गरेको हो।
३१ जेठ २०६८ मा ३४ करोड ९ लाख रुपैयाँमा ठेक्का सम्झौता भएको पुल ३० जेठ २०७२ भित्र सम्पन्न गर्ने लक्ष्य थियो। तर पाँचपल्ट म्याद थप्दा पनि ५६ प्रतिशत मात्र प्रगति भएको छ। ठेक्का रद्दसँगै १ करोड ७१ लाख रुपैयाँ कार्यसम्पादन जमानत जफत गरिनेछ।
योजना कार्यालयका प्रमुख युवराज पोखरेलका अनुसार निर्माण व्यवसायीले पेस गरेको स्पष्टीकरण चित्तबुझ्दो नभएकाले सार्वजनिक खरिद ऐनअनुसार ठेक्का रद्द गरिएको हो। बाँकी काम पूरा गर्न आवश्यक रकम सरकारी बाँकी सरह असूल गरिने र कालोसूचीमा राख्न सिफारिस गरिएको छ।
पुलका १९ स्पानमध्ये ८ वटा सकिएको छ भने बाँकी ११ मध्ये २ वटामा गर्डर हालिएको, ६ वटामा जग हालिएको र ३ वटामा जग हाल्न बाँकी रहेको छ।
स्थानीय बासिन्दाले पुल नहुँदा व्यापार–व्यवसाय र पर्यटनमा असर परेको भन्दै तत्काल निर्माण सम्पन्न गर्न माग गर्दै आएका थिए। मन्त्री कुलमान घिसिङले स्थलगत निरीक्षणपछि रुग्ण ठेक्का तोड्ने र आयोजना अघि बढाउने प्रतिबद्धता जनाएका थिए ।
