सुनसरी, १९ भदौ । सुनसरीको झुम्का कारागारमा भाइरल ज्वरोको प्रकोप तीव्र बनेको छ। पछिल्लो ६ दिनको अवधिमा चार जना कैदीबन्दीको मृत्यु भएको छ भने ३५३ जना बिरामी परेका छन्।
बुधबार राजविराज नगरपालिका–८ का ५५ वर्षीय जलेश्वर यादवको इनरुवा अस्पतालमा उपचारको क्रममा मृत्यु भएको प्रमुख जिल्ला अधिकारी धर्बेन्द्रकुमार मिश्रले जानकारी दिए। यादवलाई श्वासप्रश्वासमा गम्भीर समस्या देखिएको थियो।
यसअघि भदौ १५ गते रामदेव उराउ, १६ गते सागर राई, र आइतबार एक जना कैदीको मृत्यु भएको थियो। मृतकहरूमा उच्च ज्वरो, कमजोरी, र श्वासप्रश्वासमा समस्या देखिएको अधिकारीहरूले बताएका छन्।
३५३ बिरामीमध्ये १३ जनालाई रेफर
प्रकोप फैलिएपछि जिल्ला सुरक्षा समितिको टोली गएराति चिकित्सकसहित कारागार पुगेको थियो। प्रमुख जिल्ला अधिकारी मिश्रका अनुसार, “कुल ३५३ जनाको स्वास्थ्य परीक्षण गरियो। तीमध्ये १३ जनालाई थप उपचारका लागि रेफर गरिएको छ। १३ मध्ये १ जनामा डेङ्गु र १२ जनामा भाइरल ज्वरो देखिएको छ।”
सुरुमा कोभिड–१९ को शंका गरिए पनि हालसम्म परीक्षणमा पुष्टि नभएको अधिकारी मिश्रले बताए। आजदेखि कारागारमा बृहत् स्क्रिनिङ कार्यक्रम सुरु गरिएको छ।
संक्रमणको स्रोतबारे अनुसन्धान
प्रदेश स्वास्थ्य कार्यालय, जिल्ला स्वास्थ्य कार्यालय, र जिल्ला अस्पतालको संयुक्त टोलीले कारागारमा स्वास्थ्य परीक्षण गरिरहेको छ। खानेपानी र खाद्य वस्तु दूषित छन् वा छैनन् भन्ने परीक्षण भइरहेको छ। हालसम्म पानीमा कुनै संक्रमण देखिएको छैन।
झुम्का कारागारमा हाल १,७९५ जना कैदीबन्दी छन्। प्रकोप मुख्यतः ब्लक ‘ए’ र ‘बी’ मा फैलिएको छ। स्वास्थ्य संकटले कारागारको व्यवस्थापनप्रति गम्भीर प्रश्न उठाएको छ।
झापा अनलाइन बिर्तामोडबाट सञ्चालित अनलाइन न्यूज पोर्टल हो । यसमा प्रकाशित समाचारबारे कुनै प्रतिक्रिया भए jhapaonline75@gmail.com मा इमेल गर्नुहोला ।
