विराटनगर, ३१ भदौ । कोशी अस्पतालको औषधि पसल (फार्मेसी)मा कार्यरत तीन करार सेवाका कर्मचारीलाई स्वास्थ्य बीमा रकम दुरुपयोग गरेको आरोपमा सेवाबाट बर्खास्त गरिएको छ। बर्खास्त गरिएकामध्ये दुई जना फार्मेसी सहायक र एक जना कार्यालय सहयोगी रहेका छन् ।
अस्पताल प्रशासनले ती कर्मचारीले औषधि कम आपूर्ति गरी बढी रकम कट्टा गर्ने, चिकित्सकले नलेखेका महँगा औषधि देखाएर भुक्तानी गर्ने, तथा बिरामीका नाममा अत्यधिक औषधि देखाउनेजस्ता अनियमित कार्यमा संलग्न रहेको पुष्टि भएपछि कारबाही गरिएको जनाएको छ। यद्यपि, बर्खास्त गरिएका कर्मचारीको नाम सार्वजनिक गरिएको छैन।
क्यान्सरपीडित बिरामीको उजुरीपछि खुल्यो अनियमितता
मोरङका एक क्यान्सरपीडित बिरामीले अस्पताल प्रशासनमा लिखित उजुरी दिएपछि बीमा रकम दुरुपयोगको घटना बाहिर आएको हो। ती बिरामीलाई चिकित्सकले सात दिनका लागि औषधि लेखिदिए पनि बीमा खाताबाट एक महिनाको औषधि बराबर रकम कटाइएको थाहा पाएपछि उनले उजुरी दिएका थिए।
मेडिकल सुपरिटेन्डेन्ट डा. रुणा झाले घटनाबारे जानकारी दिँदै भन्नुभयो, “पहिले पनि कतिपय बिरामीले बीमाको औषधि दुरुपयोगबारे गुनासो गरेका थिए, तर यसपटक लिखित उजुरी आयो। उजुरीमा उल्लेखित मात्र होइन, अघिपछि काटिएका बिलसमेत परीक्षण गर्दा अनियमितता पुष्टि भएपछि उनीहरूलाई बर्खास्त गरिएको हो।”
बीमित बिरामीको चाप बढ्दो
कोशी अस्पतालमा दैनिक करिब एक हजार बिरामी सेवा लिन आउने गरेका छन्, जसमा आधाभन्दा बढी स्वास्थ्य बीमा सदस्य हुने गरेका छन्। आर्थिक वर्ष २०८१/८२ मा अस्पतालमा सेवा लिन आएका तीन लाख १७ हजार ७१८ बिरामीमध्ये एक लाख २३ हजार ९८३ जनाले बीमामार्फत उपचार सेवा लिएका थिए।
बीमित बिरामीमध्ये उच्च रक्तचाप, दम, मधुमेह, ग्यास्ट्राइटिस, तल्लो पेट दुखाइजस्ता दीर्घरोगका बिरामीको संख्या उच्च रहेको छ। मेडिसिन विभाग प्रमुख डा. दीपक सिग्देलका अनुसार यस्ता रोगहरू अब युवापुस्तामा पनि देखिन थालेका छन्, जसका कारण बीमा सेवा लिनेको चाप दिनानुदिन बढिरहेको छ।
हाडजोर्नी, स्त्री तथा प्रसूति, नाक कान घाँटी, स्नायु रोग, छाला लगायत अन्य विभागमा पनि बीमित बिरामीको चाप बढ्दो छ। स्वास्थ्य सरोकारवालाहरूका अनुसार बीमित बिरामी र दीर्घरोगीहरूको संख्या बढ्दै गएकाले औषधि आपूर्ति तथा बिलिङ प्रणालीमा पारदर्शिता कायम गर्नुपर्ने आवश्यकता झनै बढेको छ।
झापा अनलाइन बिर्तामोडबाट सञ्चालित अनलाइन न्यूज पोर्टल हो । यसमा प्रकाशित समाचारबारे कुनै प्रतिक्रिया भए jhapaonline75@gmail.com मा इमेल गर्नुहोला ।
