बिर्तामोड, २५ कात्तिक । झापाको बिर्तामोडमा विद्यार्थी प्रतिभा प्रतियोगिता ‘स्टुडेन्ट अफ द ईयर’ को अडिसन मंसिर ६ गते हुने भएको छ। आयोजकका अनुसार अडिसन अघि मंसिर ५ गते बिर्तामोडमा ट्रफी टुर कार्यक्रम आयोजना गरिनेछ ।
प्रतियोगिताका क्रिएटिभ हेड इमरान अलीका अनुसार देशभरका १३ देखि २१ वर्ष उमेर समूहका विद्यार्थीहरूलाई लक्षित गरी बिर्तामोडसहित ११ वटा शहरमा अडिसन सञ्चालन गरिनेछ ।
प्रतियोगितामा सहभागी हुन विद्यार्थीहरूले ९९० रुपैयाँ रजिस्ट्रेसन शुल्क तिर्नुपर्नेछ भने त्यसपछि फाइनलसम्म कुनै शुल्क नलाग्ने अलीले जानकारी दिए ।
प्रतियोगिताका विजेताले नगद पाँच लाख रुपैयाँ बराबरको छात्रवृत्ति र विभिन्न उपहार प्राप्त गर्नेछन् । कार्यक्रम सञ्चालिका इभा गिरीले विद्यार्थीहरूमा लुकेको प्रतिभा उजागर गर्ने उद्देश्यले प्रतियोगिता आयोजना गर्न लागिएको बताइन् । निर्णायक युवा वैज्ञानिक आरिफ अलीले ‘स्टुडेन्ट अफ द ईयर’ बाट विद्यार्थीहरूले आफूलाई निखार्ने र राष्ट्रिय तथा अन्तर्राष्ट्रिय स्तरमा चिनाउने अवसर पाउने बताए ।
प्रोड्युसर दिव्य सापकोटाले प्रतियोगिता विद्यार्थीहरूका लागि प्रतिभा प्रदर्शन गर्ने उत्कृष्ट प्लेटफर्म भएको उल्लेख गरे । कार्यक्रम संयोजक अस्विन तिम्सिनाले सबै विद्यार्थीलाई सहभागी हुन आग्रह गर्दै, “यो कार्यक्रम प्रतिभा प्रस्फुटनको अवसर हो,” भने । कार्यक्रमको सञ्चालन आरोग्य तिम्सिनाले गरेका थिए ।
