बिर्तामोड, ३० कात्तिक । झापाको बिर्तामोडमा मुख्य कार्यालय रहेको शिक्षा बहुउद्देश्यीय सहकारी संस्था लि.को १३ औं साधारणसभा अन्तरगत चार वटा इकाइगत साधारण सभा सम्पन्न भएका छन् ।
संस्थाको कात्तिक २७ गतेदेखि शुरु भएको इकाइगत साधारण सभा आज कात्तिक ३० गते सम्पन्न भएको हो । संस्थाको कात्तिक २७ गते इकाइ १ अन्तरगत धुलाबारी–दुहागढी, कात्तिक २८ गते इकाइ २ अन्तरगत शनिश्चरे–अर्जुनधारा, कात्तिक २९ गते इकाइ ३ अन्तरगत बिर्तामोड–चैतुबारी र कात्तिक ३० गते इकाइ ४ अन्तरगत दुर्गापुरको इकाइगत साधारण सभा सम्पन्न भएको हो ।
संस्थाको अध्यक्ष सुब्रत न्यौपानको अध्यक्ष एवम् सल्लाहकार संयोजक सावित्रीकुमारी लिम्बूको प्रमुख आतिथ्यमा इकाइगत साधारणसभाहरु सम्पन्न भएका हुन् । कार्यक्रमहरुमा संस्थाका अध्यक्ष न्यौपानेले वार्षिक प्रगति प्रतिवेदन र लेखा समिति संयोजक युवराज निरौलाले लेखा समितिको प्रतिवेदन प्रस्तुत गर्नुभएको थियो । साधारण सभामा सञ्चालक समिति सदस्य लक्ष्मीप्रसाद घिमिरे, रोहित काफ्ले, अशोक गिरी, रुपामाया प्रधान, लेखा समिति सदस्य यामनाथ खरेल, लक्ष्मी देवान लगायतको आतिथ्य रहेको थियो ।
संस्थाले धुलाबारी–दुवागढी इकाइ अन्तरगत उत्कृष्ट ऋणीतर्फ भगीरथा प्रसाईं, रेनुका राजवंशी, आवधिक बचततर्फ लक्ष्मी ढकाल, मनमाया बस्नेत, शिक्षा बचततर्फ श्रवण भट्टराई, सन्ध्या पौडेल, एसईई उत्कृष्ट अंक ल्याउने मान्सी शाह र आयुस भण्डारीलाई सम्मान गरेको छ ।
अर्जुनधारा–शनिश्चरे इकाइ अन्तरगत उत्कृष्ट ऋणीतर्फ मीना कार्की, आवधिक बचततर्फ शोभा दनुवार, शिक्षातर्फ रुप्सा पराजुलीलाई सम्मान गरेको छ । त्यस्तै, बिर्तामोड–चैतुबारी इकाइ अन्तगत उत्कृष्ट ऋणीतर्फ सोमनाथ ढुंगेल, मंगलसिंह राजवंशी, आवधिकतर्फ महमद सौखात, नन्दन ठाकुर, शिक्षातर्फ रिशिमा दाहाल, मिशन दाहाल, शहित दुलाल तथा एसईईमा उत्कृष्ट अंक ल्याउने समिक्षा घिमिरे, सृष्टि निरौलालाई सम्मान गरिएको छ ।
यस्तै, दुर्गापुर इकाइ अन्तरगत उत्कृष्ट ऋणीतर्फ सरिता लिम्बू, आवधिक बचततर्फ अमर भण्डारी, शिक्षा बचततर्फ नविन घिमिरे र एसईईमा उत्कृष्ट अंक ल्याउने सदिक्षा कोइरालालाई सम्मान गरिएको छ ।
बाह्य ऋण शून्य, २ करोड बचत बृद्धि
संस्थाका अध्यक्ष सुब्रत न्यौपानेले वार्षिक प्रगति प्रतिवेदन प्रस्तुत गर्नुहुँदै संस्थामा बाह्य ऋण शुन्य भएको बताउनुभयो । सदस्यको बचत बृद्धिमा प्रोत्साहन गर्दै बाह्य ऋण भरसक नलिने नीति लिएको उहाँको भनाइ छ ।
संस्थामा गत आर्थिक वर्ष २०८१–०८२ असार मसान्तसम्म शेयर सदस्य ३ हजार ९७०, ऋणी सदस्य ६८७, शेयर पु“जी ३ करोड ५१ लाख ५१ हजार ९००, बचत संकलन रू. २० करोड ७४ लाख ५२ हजार ५१९ रहेको अध्यक्ष न्यौपानेले जानकारी दिनुभयो ।
संस्थाका लेखा प्रतिवेदन प्रस्तुत गर्नुहुँदै लेखा समिति संयोजक युवराज निरौलाले संस्थामा अघिल्लो आर्थिक वर्षभन्दा करिब २ करोड रुपैयाँ बचत बृद्धि भएको बताउनुभयो । सहकारी संस्थामा १५ प्रतिशत तरलता राख्नुपर्ने प्रावधान भए पनि हाल २३.६३ प्रतिशत तरलता रहेको उहाँले बताउनुभयो ।
संस्थाका उपाध्यक्ष एवम् ऋण उपसमिति संयोजक हेमराज मिश्रले संस्थाको लगानीमा रहिरहेको रकम रू. १८ करोड ४७ लाख २५ हजार ९५६ रहेको जानकारी दिनुभयो । संस्थाको आव २०८१–८२ को कूल लगानी ११ करोड ८१ लाख ३ हजार ६६३ र कर्जा असुली १४ करोड २८ लाख ५९ हजार ३२७ रहेको उहाँले बताउनुभयो । संस्थाले गत आवमा कर्जा प्रवाहबाट २ करोड २६ लाख ३९ हजार २६६ आम्दानी गरेको छ ।
सदस्यमुखी कार्यक्रम
शिक्षाको साथ सदस्य उपचारमा राहत कार्यक्रम अन्तर्गत शिक्षा स्वास्थ्य उपचार कोषमा योगदान गरेका सदस्यले अधिकतम २ लाख रुपैयाँसम्म उपचार सुविधा प्राप्त गर्दै आएको संस्थाका सचिव सूर्य खतिवडाले जानकारी दिनुभयो । संस्थाले सेयर सदस्यलाई प्रसूति सहायतावापत अधिकतम् १५ हजार रुपैयाँसम्म उपलब्ध गराउँदै आएको बताउनुहुँदै उहाँले पुरुष सदस्यले समेत मातृशिशु सहायताबापत साढे ७ हजार रुपैयाँ प्राप्त गर्दै आएको उल्लेख गर्नुभयो ।
ऋणी सदस्यको मृत्यु भए कर्जा मिनाहा दिने नीतिलाई निरन्तरता दिँदै अघिल्लो आर्थिक वर्षमा ऋणी सदस्य गोपाल दर्जीको असामयिक निधन भएकाले निजको रू १ लाख ७२ हजार ४९२ कर्जा संस्थाले मिनाह गरेको सचिव खतिवडाले बताउनुभयो ।
१३ लाख बढी कर दाखिला
संस्थाले आर्थिक वर्ष २०८१/०८२ मा व्याज करवापत रू ८ लाख ३६ हजार ३३, सामाजिक सुरक्षा करवापत रू ७८ हजार ५७०, भत्ता करवापत रू १ लाख ३८ हजार १५२, घरबहाल करवापत रू २० हजार ४६७, आय करवापत रू २ लाख ४२ हजार ६८७.२० गरी कूल रू १३ लाख १५ हजार ९०९.२० कर दाखिला गरेको संस्थाका व्यवस्थापक तीर्थराज तिम्सिनाले जानकारी दिनुभयो ।
सहकारी विद्यालय सञ्चालन
संस्थाले नयाँ सोच र अवधारणासहित सहकारी विधि र प्रक्रियामार्फत खोलिएको शिक्षा शिकोप निकेतन सञ्चालनमा रहेको संस्थाकी सञ्चालक समिति सदस्य एवम् विद्यालय व्यवस्थापन समिति अध्यक्ष चिजा राईले जानकारी दिनुभयो । सहकारीमा आवद्ध सदस्यका छोरा–छोरीलाई सहुलियतरुपमा गुणस्तरीय शिक्षा दिने उद्देश्यले २०७७ फागुन ४ गते शिक्षा शिकोप निकेतन स्थापना भएको उहाँले बताउनुभयो ।
अभिभावकको माग, आवश्यकता र चाहनाका आधारमा विद्यालय हाल कक्षा–२ सम्म सञ्चालन भइरहेको छ भने हरेक वर्ष कक्षा थप हु“दै गएको उहाँले बताउनुभयो । अहिले स्कूल आफ्नैै भवनमा बिर्तामोड–२ समृद्ध टोलमा सञ्चालन भइरहेको छ ।
सहकारी संस्थाले विद्यालय/क्याम्पस सञ्चालनका लागि बिर्तामोड–२ मा १० कठ्ठा जग्गा खरिद गरिसकेको छ । विद्यालयमा १३ जनाले प्रत्यक्ष रोजगारी पाएका छन् ।
संस्थाको १३ औं साधारण सभा अन्तरगतको अन्तिम माइन्युट प्रमाणिकरण भेला मंसिर ४ गते हुनेछ ।
झापा अनलाइन बिर्तामोडबाट सञ्चालित अनलाइन न्यूज पोर्टल हो । यसमा प्रकाशित समाचारबारे कुनै प्रतिक्रिया भए jhapaonline75@gmail.com मा इमेल गर्नुहोला ।
