भद्रपुर, ६ माघ । पूर्वीनाका काँकरभिट्टाबाट चालू आर्थिक वर्षको छ महिनाको अवधिमा २५ अर्ब बढीको सामान आयात भएको छ ।
चालु आर्थिक वर्ष २०८२–८३ को पुस मसान्तसम्ममा २५ अर्ब ३ करोड ६६ लाख मूल्य बराबरका सामान आयात भएको मेची भन्सार कार्यालयका सूचना अधिकारी ईश्वरकुमार हुमागाईंले जानकारी दिनुभयो । गत आव २०८१–८२ को सोही अवधिको तुलनामा आठ दशमलव ३९ प्रतिशतले आयात बढेको छ । गत आवको पहिलो छ महिनामा २३ अर्ब नौ करोड ८८ लाख बराबरको सामान आयात भएको थियो ।
चालु आवको पहिलो छ महिनामा यो नाकाबाट हुने निर्यात घटेको छ । अवधिमा १३ अर्ब ६७ करोड ३७ लाख मूल्य बराबरको सामान विभिन्न मुलुक निर्यात भएको थियो । गत आवको सोही अवधिमा १३ अर्ब ८४ करोड चार लाखको वस्तु तथा सामान निर्यात भएको थियो । यो नाकाबाट हुने निर्यात एक दशमलव २० प्रतिशतले घटेको कार्यालयले जनाएको छ ।
पूर्वीनाकाबाट निर्यात हुने मुख्य वस्तुमा अलैँची, चिया, प्लाइउड, भेनिउर सिट, छुर्पी, अम्रिसो, अदुवा, सुठो, मुसुरो, काउली, बन्दागोपी, ब्रोकाउली, जडीबुटीलगायत रहेका छन् भने आयात हुने मुख्य मालवस्तुमा पेट्रोलियम पदार्थ, तयारी कपडा, तरकारी, यातायातका साधन र तिनका पाटपुर्जा, तरकारी, सिमेन्ट क्लिङ्कर, शृङ्गारका सामान, कफी, प्लास्टिकका कच्चा पदार्थ, अलकत्रा बिटुमिनलगायत रहेका छन् । कार्यालयको तथ्याङ्कअनुसार चालु आवको पुस मसान्तसम्ममा आयात निर्यातबाट आठ अर्ब ४० करोड ९१ लाख ९६ हजार राजस्व सङ्कलन भएको छ ।
झापा अनलाइन बिर्तामोडबाट सञ्चालित अनलाइन न्यूज पोर्टल हो । यसमा प्रकाशित समाचारबारे कुनै प्रतिक्रिया भए jhapaonline75@gmail.com मा इमेल गर्नुहोला ।
