मुम्बई, १२ असार । सलमान खान एक क्रिकेट क्लबका प्रमुख बनेका छन् । शाहरुख खानलाई पछ्याउँदै अर्का बलिउड अभिनेता सलमान खान पनि क्रिकेटको दुनियाँमा प्रवेश गरेका हुन् ।
भारतीय संचारमाध्यमका अनुसार उनी एक क्रिकेट क्लबका मालिक बनेका छन् । तर, आइपीएल चाहिँ होइन । इन्डियन स्ट्रिट प्रिमियर लिग (आईएसपीएल)को लागि उनी दिल्लीको एक क्लबका प्रमुख बनेका हुन् ।
नयाँ दिल्ली क्लब र सलमानको संलग्नताले यो लिगको द्रुत विकास र बढ्दो सांस्कृतिक प्रवर्धनमा मद्दत गर्ने आयोजकको विश्वास छ ।
आइएसपीएललाई भारत रत्न सचिन तेन्दुलकर, एसियाली क्रिकेट परिषद्का सदस्य तथा क्याबिनेट मन्त्री आशिष शेलार, मीनल अमोल काले र सुरज समत सम्मिलित कमिटीले समर्थन गरेको छ ।
यो नयाँ क्रिकेट लिगको दोस्रो संस्करणलाई २८ मिलियन दर्शकले टिभीमा हेरेका थिए भने दर्शक संख्यामा ४७ प्रतिशतले वृद्धि भएको थियो । तेस्रो सिजनमा सलमान खानजस्ता स्टार जोडिएका छन् ।
अमिताभ बच्चन, अक्षयकुमार, ऋतिक रोशन, करिना र सैफअली खान, रामचरण, सूर्या यसअघि नै लिगको बोर्डमा जोडिएका छन् । स्टार पावरको मद्दतमा यो लिगले थप चर्चा पाउने विश्वास आयोजकको छ ।
