झापा अनलाइन

झापा, २० फागुन । स्वास्थ्य तथा जनसङ्ख्या मन्त्रालयले आगामी निर्वाचनलाई लक्षित गर्दै सबै अस्पतालमा ‘द्रुत प्रतिकार्य टोली’ गठन गर्न निर्देशन दिएको छ । मन्त्रालयका प्रवक्ता डा. प्रकाश बुढाथोकीका अनुसार अस्पतालको जनशक्ति अनुसार पाँचदेखि २५ जनासम्मको टोली गठन गर्न भनिएको हो । टोलीले जिल्ला प्रशासनसँग समन्वय गरी घाइतेलाई अस्पतालसम्म ल्याउने, एम्बुलेन्स व्यवस्थापन गर्ने तथा चिकित्सक टोलीमार्फत उपचार गर्ने जिम्मेवारी पाउनेछ। निर्वाचनका दिन अस्पतालले आकस्मिक सेवा मात्र सञ्चालन गर्ने र ७७ जिल्लाका आपतकालीन कार्य सञ्चालन केन्द्रलाई तयारी अवस्थामा रहन निर्देशन दिइएको मन्त्रालयले जनाएको छ।

सिरहा, २० फागुन । सिरहा क्षेत्र नं. ३ का जसपा उम्मेदवार अशेश्वर यादव मौन अवधिमा नगदसहित पक्राउ परेका छन् । भारत सीमास्थित माडरबाट सदरमुकामतर्फ आउँदै गरेको गाडी चेकजाँच गर्दा ४ लाख ८७ हजार रुपैयाँसहित मतपत्र फेला परेको प्रहरीले जनाएको छ। यादवसहित पाँच जनालाई नियन्त्रणमा लिइएको छ । बरामद सामग्रीबारे अनुसन्धान जारी रहेको र कानुनी प्रक्रिया पूरा गरी मुख्य निर्वाचन अधिकृतको कार्यालयमा पठाउने तयारी भइरहेको जिल्ला प्रहरी कार्यालय सिरहाले जनाएको छ ।

झापा, २० फागुन । मध्यपूर्वमा विकसित परिस्थितिलाई ध्यान दिँदै परराष्ट्र मन्त्रालयले सञ्चालनमा ल्याएको पोर्टललाई खाडी क्षेत्रका विभिन्न दूतावासले आवश्यक प्रचारप्रसार र समन्वय गरेका छन् । नेपाली दूतावास रियादले नेपालीको नाम दर्ताका लागि पोर्टल सञ्चालनमा ल्याएको जानकारी दिँदै आवश्यक सूचना उपलब्ध गराउन नेपाली श्रमिकलाई आग्रह गरेको छ । दूतावासका अनुसार नेपाली नागरिकको अवस्थासम्बन्धी तथा आवश्यक कारबाहीको प्रयोजनका लागि सूचना सङ्कलनका लागि पोर्टल सञ्चालनमा ल्याइएको हो । परराष्ट्र मन्त्रालयको तयार पारेको सो पोर्टलमा साउदी अरेबिया, यमनमा रहेका नेपालीका बारेमा सूचना सङ्कलन गरिनेछ । यस्तै, विभिन्न राजनीतिक दलसम्बद्ध प्रवासी सङ्घसंस्थाले पनि नेपालीको सहयोगका लागि विभिन्न सम्पर्क व्यक्ति तोकिएको जनाएका छन् ।

झापा, १९ फागुन । निर्वाचनमा खटिने कर्मचारीले आफ्ना सेवा समूहसम्बन्धी कानुनमा व्यवस्था भएका आचरणका अतिरिक्त निर्वाचन आचारसंहिता, २०८२ मा व्यवस्था भएका आचरणसमेत पालना गर्नुपर्ने निर्वाचन आयोगले जनाएको छ । आयोगले जारी गरेको निर्वाचन आचारसंहिता, २०८२ मा कुनै कर्मचारीले उम्मेदवार वा राजनीतिक दलको पक्ष वा विपक्षमा प्रचारप्रसार गर्न नहुनेलगायतका आचरणका व्यवस्थाहरू गरिएका छन् । आचारसंहितामा निर्वाचनमा संलग्न रहने कर्मचारी तथा सुरक्षाकर्मीले आफ्नो पदीय कर्तव्य तथ्य र निष्पक्ष रही गर्नुपर्ने, निर्वाचन अवधिभर मुलुकको प्रतिनिधित्व हुने गरी विदेश भ्रमणमा जानबाहेक अन्य प्रयोजनका लागि नेपाल सरकार, प्रदेश सरकार वा स्थानीय तहका कर्मचारी वा सार्वजनिक पद धारण गरेको व्यक्ति निर्वाचन आयोगको पूर्वस्वीकृतिविना विदेश भ्रमणमा जान…

बिर्तामोड, १९ फागुन । नेपाल पत्रकार महासंघ झापा शाखाले फागनु २१ गते हुने प्रतिनिधिसभा सदस्य निर्वाचनमा पत्रकार आचारसंहिता र निर्वाचन आचारसंहिता पूर्णरुपमा पालना गर्न आह्वान गरेको छ । झापा शाखाले आज एक प्रेस विज्ञप्ति जारी गर्दै बिहीबार हुने निर्वाचनलाई स्वतन्त्र, स्वच्छ, निष्पक्ष, शान्तिपूर्ण, सबैका लागि पहुँचयुक्त, भयरहीत र धाँधलीरहीत रुपमा सम्पन्न गर्न आग्रहसमेत गरेको छ । निर्वाचनमा सञ्चार क्षेत्रले अझ जिम्मेवार भूमिका निर्वाह गर्नुपर्नेमा महासंघले जोड दिएको छ । निर्वाचनको मौन अवधिमा सञ्चार क्षेत्रसहित सबै सारोकारवालालाई पुनः स्मरण गराउँदै आम सञ्चारमाध्यम र पत्रकारका लागि सात बुँदे आचारसंहिता जारी गरिएको महासंघका सचिव राजु पाठकले बताउनुभयो । यस्ता छन् सात बुँदे पत्रकार…

झापा, १९ फागुन । प्रतिनिधिसभा सदस्य निर्वाचनमा मतदान गर्न मतदाताले आफ्नो मतदाता परिचयपत्र वा नेपाली नागरिकताको प्रमाणपत्र साथै लिएर मतदान केन्द्रमा जानुपर्ने निर्वाचन आयोगले जनाएको छ । यही फागुन २१ गते हुने निर्वाचनमा राष्ट्रिय परिचयपत्र वा राहदानी वा जग्गाधनी प्रमाणपुर्जा वा सवारी चालक अनुमति पत्र पनि मतदानका निम्ति मान्य हुने आयोगले बताएको छ । आयोगले सार्वजनिक गरेको अन्तिम मतदाता नामावलीमा नाम भएका र यही फागुन २० गतेसम्म १८ वर्ष उमेर पूरा भएका मतदाताले निर्वाचनमा तोकिएको मतदान केन्द्रमा गई मतदान गर्न पाउनेछन्।

झापा, १९ फागुन । देशका विभिन्न भागमा सोमबार भएका छुट्टाछुट्टै सवारी दुर्घटनामा १५ जनाको मृत्यु भएको छ । केन्द्रीय प्रहरी समाचार कक्षकाअनुसार सर्लाही, सुनसरी, बारा, मकवानपुर, भक्तपुर, चितवन, धादिङ, कास्की, बाँके, रूकुम पूर्व, रुपन्देही र कञ्चनपुरमा भएका सवारी दुर्घटनामा उनीहरूको मृत्यु भएको हो ।

महेन्द्रनगर, १७ फागुन । कञ्चनपुरमा निर्वाचन प्रहरीसहित दुई जनाको मृत्यु भएको छ । पुनर्बास नगरपालिकामा खटिएका निर्वाचन प्रहरीको आज उपचारका क्रममा मृत्यु भएको हो । जिल्ला प्रहरी कार्यालयका प्रवक्ता एवं प्रहरी नायव उपरीक्षक हेमबहादुर शाहीका अनुसार लालझाडी गाउँपालिका–३ बल्मी घर भई पुनर्बास नगरपालिका–९ सिताबस्तीस्थित जीवनशक्ति आधारभुत मतदानस्थलमा खटिएका निर्वाचन प्रहरी ३५ वर्षीय मानसिंह रानाको मृत्यु भएको हो । सोमबार राति खाना पकाउने क्रममा बेहोस भएका उनको आज धनगढीस्थित निशर्ग अस्पतालमा उपचारका क्रममा मृत्यु भएको हो । राना उच्च रक्तचाप र मधुमेह रोगबाट पीडित भएको पाइएको प्रवक्ता शाहीले बताउनुभयो । यसैगरी मोटरसाइकल दुर्घटनामा एक युवकको मृत्यु भएको छ । बेदकोट नगरपालिकामा…

झापा, १९ फागुन । निर्वाचन सुरक्षालाई लक्षित गर्दै पूर्वी पृतना अन्तर्गत कोशी प्रदेशका सबै जिल्लामा करिब १२० स्थानमा बम डिस्पोजल टोली तैनाथ गरिएको पूर्बी पृतनाले जानकारी दिएको छ । पृतनाले शङ्कास्पद वस्तु देखिए वा फेला परेमा तत्काल नजिकैको सुरक्षा निकायलाई जानकारी गराउन सेनाले सर्वसाधारणमा अपिल गरेको छ ।

बिर्तामोड, १९ फागुन । बिर्तामोड उद्योग वाणिज्य संघको व्यवसायी सदस्य राहत कोषमा वेदप्रकाश अग्रवाल दम्पतीले आर्थिक सहयोग प्रदान गरेका छन् । संघका पूर्व अध्यक्ष वेदप्रकाश अग्रवाल र सन्तोषदेवी अग्रवालले आफ्नो बैवाहिक वर्षगाँठको अवसरमा सोमबार कोषका लागि २१ हजार रुपैयाँ सहयोग गरेका हुन् । उक्त रकम संघका अध्यक्ष राजु न्यौपाने, राहत कोष संयोजक राजकुमार घिमिरे (राजु), विशिष्ट सदस्य निर्मल भट्टराई तथा उद्योग उपाध्यक्ष विशाल थापालाई हस्तान्तरण गरिएको थियो । व्यवसायी सदस्यहरूलाई आपत्कालीन अवस्थामा सहयोग गर्ने उद्देश्यले स्थापना गरिएको राहत कोषलाई आगामी दिनमा एक करोड रुपैयाँ पुर्‍याउने लक्ष्य राखिएको संघले जनाएको छ। हालसम्म कोषमा २५ लाख रुपैयाँभन्दा बढी रकम संकलन भइसकेको छ।…