झापा, २६ कात्तिक । नेकपा एमालेका पोलिटब्युरो सदस्य तथा कोशी प्रदेशका मुख्यमन्त्री हिक्मतकुमार कार्कीले आगामी मंसिर २७–२९ गतेसम्म हुने पार्टीको ११औं महाधिवेशनमा केन्द्रीय सचिव पदमा उम्मेदवारी दिने घोषणा गरेका छन्।
बुधबार बिहान विराटनगरस्थित होटल स्वागतममा एमालेनिकट प्रेस चौतारी कोशी र मोरङका केही पत्रकारहरूसँगको भेटमा उनले उक्त घोषणा गरेका हुन्। ‘उहाँले केन्द्रीय सचिवमा लड्ने र आफूलाई सहयोग गर्नुपर्ने भनेर स्पष्ट भन्नुभएको छ,’ एक निकट स्रोतले जानकारी दियो।
भेटमा कार्कीले पार्टीभित्र अध्यक्ष केपी शर्मा ओलीविरुद्ध २०–२५ प्रतिशत सदस्यहरू असन्तुष्ट देखिए पनि त्यसले नेतृत्वमा खासै असर नपर्ने दाबी गरे। स्रोतका अनुसार उनले भने, ‘केही मान्छे अध्यक्ष ओलीविरुद्ध लागेका छन्, तर त्यो संख्या नेतृत्व परिवर्तनको लागि पर्याप्त छैन।’
मुख्यमन्त्री कार्कीले कोशी प्रदेश सरकारले गरेका सकारात्मक कामहरूको प्रचार गर्न पत्रकारहरूलाई आग्रह गरे। साथै, उनले आफ्नै मन्त्रीहरूले अपेक्षित परिणाम नदिएको भन्दै केही दिनमै मन्त्रीमण्डल पुनर्गठन हुने संकेत पनि दिए। ‘अब रिजल्ट दिने मन्त्री नियुक्त हुन्छन्,’ उनले भने।
उनको भनाइअनुसार मंसिरको पहिलो हप्तासम्म नयाँ मन्त्रीहरू नियुक्त गरिनेछ। ‘सरकार अब जनताको नजरमा नतिजा देखिने गरी काम गर्ने मोडमा जान्छ,’ उनले स्पष्ट पारे।
मुख्यमन्त्री कार्कीले जेनेजी आन्दोलनका नाममा भएको आगजनी, तोडफोड र लुटपाटले प्रशासनिक संरचना कमजोर बनाएको उल्लेख गरे। ‘हाम्रा सबै संरचनाहरू जलेका छन्, तर अब परिणाम देखिने गरी अघि बढ्छौँ,’ उनले भने।
