बिर्तामोड, २ असार । झापाको बिर्तामोडमा पत्रकारितामा प्रविधिको प्रयोग बिषयक तालिम सम्पन्न भएको छ । प्रेस सेन्टर नेपाल जिल्ला समन्वय समिति झापाको आयोजना र बिर्तामोड नगरपालिकाको आर्थिक सहयोगमा तालिम सम्पन्न भएको हो ।
प्रविधिले मारेको फड्कोसँगसँगै पत्रकारितामा आफुलाई हिँड्न सघाउने उद्देश्यले कार्यक्रम आयोजना गरिएको आयोजक संस्थाका अध्यक्ष पुष्प खड्काले जानकारी दिए । कृतिम बुद्धिमताले पत्रकारितामा समेत धेरै सहज बनाउँदै लगेको र सो बारे स्थानीय पत्रकारहरुलाई जानकारी दिने उद्धेश्यले कार्यक्रम आयोजना गरिएको उनको भनाइ छ ।
कार्यक्रमका प्रमुख अतिथी बिर्तामोड नगर उपप्रमुख नगेन्द्रप्रसाद संग्रौलाले पत्रकारले खोजमुलक र तथ्यपरक समाचार लेखनमा जोड दिनुपर्ने बताए । नराम्रा टिकाटिप्पणी र भ्युज बढाउने भन्दा पनि मुलधारका मिडियाले सत्यतथ्यमा आधारित रहेर सकारात्मक समाचार लेख्नु पर्ने उनको भनाइ थियो ।
कार्यक्रमका बिशिष्ट अतिथी नेपाल पत्रकार महासंघ झापाका अध्यक्ष एकराज गिरीले पत्रकारले प्रविधिको सहयोग बिना पेशालाई समयसापेक्ष बनाउन नसक्ने अवस्था आएको र सबैले आफुलाई अपडेट गर्दै लैजानुपर्ने बताए । उनले पत्रकारितामा संकट सिर्जना भएकाले कर्म गर्दा आचारसंहिता नभुल्नसमेत उनले आग्रह गरे ।
कार्यक्रममा नेपाल पत्रकार महासंघ कोशी प्रदेश सदस्य राजकुमार ओली, प्रेस चौतारी नेपाल झापा अध्यक्ष प्रदिप परियार, नारी सञ्चार गृह झापाकी अध्यक्ष स्वस्तिका आचार्य, पर्यटन पत्रकार मञ्च झापाका अध्यक्ष विनोद पाण्डे लगायतले शुभकामना मन्तव्य राखेका थिए ।
एआईको प्रयोगले पत्रकारिता पेशालाई कसरी सहज र सरल बनाउँछ भन्ने बारेमा प्रशिक्षक उमाकान्त खनालले सहभागीहरुलाई जानकारी गराएका थिए । उनले पत्रकारितामा एआईको सहयोग लिइएपनि अन्तिम सम्पादक मानव नै हुनुपर्ने बताए ।
सहभागीहरुलाई प्रेस सेन्टर नेपालका केन्द्रिय सचिव दिपिन राईले प्रमाणपत्र हस्तान्तरण गरेका थिए । कार्यक्रममा ५० जना बढीको सहभागिता रहेको थियो । कार्यक्रममा प्रेस सेन्टर नेपाल जिल्ला समन्वय समिति झापाका उपाध्यक्ष होमप्रकाश अधिकारीले स्वागत गरेका थिए भने सहसचिव राजन साम्पाङले सञ्चालन गरेका थिए ।
