झापा, १८ भदौ । रसुवाको भोटेकोशी नदीमा आएको विनाशकारी बाढीमा परी मृत्यु हुनेको सङ्ख्या एक हजार २०४ पुगेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अझै चार हजार २१६ जना सम्पर्कविहीन छन् ।
बाढी प्रभावित क्षेत्रमा बुधबार साँझसम्म ११ हजार ९९३ जनाको उद्धार गरिएको छ भने ३०१ जना घाइते भएका छन् । प्राधिकरणका अनुसार सबैभन्दा धेरै शव चितवनमा ३४८ वटा फेला परेका छन् । त्यस्तै नवलपरासी पूर्वमा २१७, नवलपरासी पश्चिममा २०२, नुवाकोटमा १५५, रसुवामा ११५, गोरखामा ६९, धादिङमा ६० र तनहुँमा ३८ शव फेला परेका छन् । फेला परेकामध्ये ९५ शवको सनाखत भइसकेको छ ।
बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बल नेपालका २१ हजार ३१४ सुरक्षाकर्मी खोज तथा उद्धारमा परिचालन भएका छन् । बाढीका कारण घरबारविहीन भएका तीन हजार ४५३ जना नुवाकोट, धादिङ, रसुवा र काठमाडौँका होल्डिङ सेन्टरमा रहेका छन् ।
सम्पर्कविहीनको खोजी तथा प्रभावित क्षेत्रमा राहत र उद्धार कार्यलाई तीव्रता दिइएको प्राधिकरणले जनाएको छ ।
