सन्तोष शर्मा
झापा, ५ कात्तिक । झापाको बिर्तामोड–२ स्थित सहारा नेपाल (एनजीओ) ले चार लाख ५० हजार बढी मानिसलाई सेवा दिएको छ ।
संस्थाले विगत तीन दशकको अवधिमा ३५ वटा विभिन्न राष्ट्रिय–अन्तर्राष्ट्रिय साझेदार संस्थाहरूसँग साझेदारी गरी ३५ वटा जिल्लामा ६६ वटा विभिन्न परियोजनाहरू सञ्चालन गरी चार लाख ५० हजारभन्दा बढी मानिसलाई प्रत्यक्ष सेवा पु¥याएको सहारा नेपालका सचिव महेन्द्र गिरीले जानकारी दिनुभयो ।
स्थानीय तह र साझेदार संस्थासँगको सहकार्यमा गरी गरिब तथा सीमान्तकृत समुदायका लागि सुरक्षित आवास निर्माणदेखि लिएर वित्तीय साक्षरतासम्मका कार्यक्रम गरिएको उहाँले बताउनुभयो ।
झापा र मोरङका चार हजारभन्दा बढी सीमान्तकृत परिवारलाई सुरक्षित आवास निर्माण गरी हस्तान्तरण गरिएको छ भने तीन हजारभन्दा बढी न्यून आय भएका परिवारका लागि सुरक्षित घर निर्माण गरिएको छ ।
सहारा नेपालले वित्तीय साक्षरता अन्तरगत ६ हजारभन्दा बढी न्यून आय भएका महिलालाई बचत, बीमा तथा पारिवारिक आम्दानीको विश्लेषणसम्बन्धी वित्तीय साक्षरता कक्षा सञ्चालन गरेको छ ।
कृषि तथा ऊर्जा प्रवद्र्धन कार्यक्रम अन्तरगत २ हजारभन्दा बढी किसान परिवारलाई कीटमुक्त तथा उन्नत उत्पादन सम्बन्धी एकीकृत कीट व्यवस्थापन तालिम दिइएको छ भने २ हजारभन्दा बढी परिवारलाई वैकल्पिक ऊर्जा प्रवद्र्धनका लागि सौर्य ऊर्जा जडानमा सहयोग गरिएको संस्थाले जनाएको छ । ५ सयभन्दा बढी सुक्खा क्षेत्रका किसानलाई सिँचाइका लागि शालो ट्युबवेल वितरण सचिव गिरीले जानकारी दिनुभयो ।
स्वास्थ्य र सरसफाइ क्षेत्रमा सहारा नेपालले हालसम्म २३ हजार सुधारिएको चुलो वितरण गरेको छ । जसबाट १ लाखभन्दा बढी मानिस लाभान्वित भएका छन् ।
झापा जिल्लालाई खुला दिसा मुक्त क्षेत्र घोषणा गर्न सहयोग गर्नुका साथै मेचीनगर, बाह्रदशी, अर्जुनधारा नगरपालिकाका १० वटा खानेपानी योजनामा सहयोग गरिएको छ । एचआईभी, क्षयरोग, कुष्ठरोग लगायतका रोगहरूको रोकथाम तथा व्यवस्थापनका लागि समुदाय परिचालन गरिएको संस्थाले जनाएको छ ।
शिक्षा र पूर्वाधार साक्षरता अभियानमार्फत् ३ हजार भन्दा बढी व्यक्तिहरूलाई साक्षर बनाइएको छ । झापा जिल्लाका दुर्गम क्षेत्रहरूमा ५१ वटा झोलुंगे/पैदल पुल निर्माण गरी ६० हजार भन्दा बढी परिवारहरू प्रत्यक्ष लाभान्वित भएका छन् ।
विपद् जोखिम न्यूनीकरण तथा वातावरण संरक्षणका लागि बाँस रोपण तथा प्रवद्र्धन कार्यक्रम सञ्चालन गरिएको संस्थाले जनाएको छ ।
यसैबीच, संस्थाले ३० वर्ष पूरा गरी ३१ वर्ष प्रवेश गरेको अवसरमा आज सम्पूर्ण साझेदार संस्था, सामाजिक अभियन्ता, शुभचिन्तकहरुमा हार्दिक शुभकामना व्यक्त गर्दै आगामी दिनमा समेत रचनात्मक सहयोगको अपेक्षा गरेको छ ।
