झापा, १३ कात्तिक । नेपाली कांग्रेसका अधिकांश केन्द्रीय सदस्यहरूले पार्टीको आगामी महाधिवेशन नियमित प्रक्रिया अनुसार गर्नुपर्ने धारणा राखेका छन्। पार्टीभित्र विशेष महाधिवेशनको प्रस्तावबारे रस्साकस्सी भइरहेका बेला जारी केन्द्रीय समिति बैठकमा अधिकांश सदस्यहरूले नियमित महाधिवेशन नै उपयुक्त हुने मत व्यक्त गरेका हुन्।
बैठकपछि सञ्चारकर्मीहरूसँग कुरा गर्दै पार्टी प्रवक्ता प्रकाशशरण महतले देशको राजनीतिक संकट, आगामी निर्वाचनको सुरक्षा अवस्था र महाधिवेशनको विषयमा सदस्यहरूले धारणा राखेको जानकारी दिए। उनका अनुसार, “अधिकांश साथीहरूले नियमित महाधिवेशनमा जानुपर्ने र त्यसका लागि राष्ट्रिय निर्वाचनलाई प्राथमिकता दिनुपर्ने धारणा राख्नुभएको छ। केहीले चुनाव अगावै अधिवेशन गर्नुपर्ने मत पनि राख्नुभएको छ।”
प्रवक्ता महतले आगामी २१ फागुनमा तोकिएको निर्वाचनका लागि सरकारले सुरक्षाको प्रत्याभूति दिलाउन नसकेको भन्दै केन्द्रीय सदस्यहरूले चिन्ता व्यक्त गरेको बताए। गाउँस्तरमा शान्ति सुव्यवस्था कायम नभएको अवस्थामा निष्पक्ष, भयरहित र शान्तिपूर्ण निर्वाचन हुनेमा आशंका रहेको धारणा बैठकमा उठेको थियो।
यद्यपि, सरकारले निर्वाचनका लागि उचित वातावरण बनाउने हो भने कांग्रेसले चुनावमा सघाउने तयारी रहेको पनि सदस्यहरूले स्पष्ट पारेको महतले जानकारी दिए।
बैठकमा संसद पुनःस्थापनाको सम्भावनाबारे पनि छलफल भएको महतले बताए। उनका अनुसार, “सरकारले प्रस्ताव गरेको निर्वाचनका सम्बन्धमा अझै पनि गाउँ–गाउँमा सुरक्षाको प्रत्याभूति नभएको कारणले शान्तिपूर्ण निर्वाचन सम्भव हुन्छ कि हुँदैन भन्ने विषयमा सदस्यहरूले गम्भीर धारणा राख्नुभएको छ। साथै, संसद पुनःस्थापनाका विषयमा पनि केही सदस्यहरूले सम्भावनाबारे बोलेका छन्।”
समग्रमा, निर्वाचनको वातावरण बनेमा कांग्रेसले निर्वाचनमा जानुपर्ने धारणा बैठकमा प्रमुख रूपमा प्रस्तुत भएको महतले निष्कर्ष निकाले।
