बनियानी, २३ कात्तिक । झापामा हर्षोउल्लासका साथ छठ पर्व मनाइएको छ ।
व्रतालुहरुले आज बिहान उदाउँदो सूर्यलाई अघ्र्य दिएसँगै छठ पर्व सम्पन्न भएको हो । झापाका मेची, निन्दा, हडिया, देउनिया, अदुवा, बिरिङ, कन्काई, रुतुवा, मावा, बनियानी, देउनिया लगायत खोला–नदी किनारमा भव्य रूपमा पूजा गरिने छ ।
झापाको कनकाईस्थित बिरिङ खोलाको किनारमा यहाँका स्थानीयबासीले समावेशी रुपमा छठ पर्व मनाए । २०४५ सालदेखि नै यहाँ छठ पर्व गरिँदै आए पनि पछिल्लो समय सबै जातजाति मिलेर समावेशी रुपमा छठ पर्व मनाउँदै आएको श्री छठ पूजा समिति कनकाई–९ घैलाडुब्बाका अध्यक्ष राजेश शाहले बताउनुभयो ।
झापाको भद्रपुर नगरपालिका–५ स्थित मेची नदीमा नेपाल तथा भारततिरबाट वारिपारि भव्य रूपमा छठ पूजा गरियो । एक हजार बढी पूजा स्थल निर्माण गरी तीन किलो मिटर क्षेत्रमा नदीको वारिपारि दुवै पट्टिबाट सबै जातजातिले समावेशी रुपमा साझा पर्व मनाइएको मैथिल समाज भद्रपुरका पूर्व अध्यक्ष रमेशचन्द्र झाले बताउनुभयो ।
पूजास्थलमा नेपाल–भारतका सुरक्षाकर्मीले संयुक्त रुपमा सुरक्षा प्रदान गरेका थिए । विभिन्न सामाजिक संघ–संस्थाले मेलामा सहभागी भक्तजनका लागि पानी तथा चियाको निःशुल्क व्यवस्था गरे ।
चारदिनसम्म मनाइने छठ पर्वको पहिलो दिन ‘नहा इखाइ’, दोस्रो दिन ‘खरना’ गरिएको थियो भने आज तेस्रो दिन बेलुका अस्ताउँदो सूर्यलाई अघ्र्य दिने र चौथो भोलि बिहान उदाउँदो सूर्यलार्य अघ्र्य दिएपछि सम्पन्न भएको हो ।
